Хичээл заасан багш: Б. Очирбаяр (Ph.D)
“Багшлах дадлага” хичээл нь багш мэргэжлээр төгсөх гэж буй оюутнуудад зориулсан бөгөөд багшлах дадлагын үйл ажиллагааг амжилттай хэрэгжүүлэхэд шаардлагатай мэдлэг, арга зүй, баримт бичгийн боловсруулалт болон мэргэжлийн ур чадварыг эзэмшүүлэх зорилготой. Энэхүү хичээлээр дамжуулан суралцагч багшлах дадлагын зорилго, ач холбогдол, зохион байгуулалт, хэрэгжүүлэх үе шат, үнэлгээний шалгуур болон тайлан боловсруулах аргачлалын талаар цогц ойлголттой болно.
Хичээлийн хүрээнд багшлах дадлага гэж юу болох, дадлагад хэрхэн бэлтгэх, дадлагын байгууллага сонгох, хүсэлт гаргах, хугацааны болон нарийвчилсан төлөвлөгөө боловсруулах, ажиглалт судалгаа хийх, тайлан бэлтгэх, хамгаалах зэрэг бүхий л үйл ажиллагааг шат дараатайгаар судална. Мөн дадлагын явцад мөрдөх ёс зүй, мэргэжлийн хандлага, боловсролын байгууллагын онцлог орчинд ажиллах шаардлагуудыг ойлгож, багшийн өдөр тутмын үйл ажиллагаатай танилцах боломжтой.
Энэхүү хичээлийн онцлог нь зөвхөн дадлагын удирдамж тайлбарлахаар хязгаарлагдахгүй, бодит хичээл заах үйл ажиллагааг жишээ болгон үзүүлсэнд оршино. Хичээлд багш тухайн сэдвийг хэрхэн төлөвлөж, хичээлээ хэрхэн удирдан зохион байгуулж, суралцагчидтай хэрхэн харилцаж, үнэлгээ хийж байгааг алхам бүрээр тайлбарласан жишиг видео хичээлүүдийг багтаасан. Ингэснээр оюутан бодит анги танхимын нөхцөлд багшлах үйл ажиллагааг ажиглан суралцаж, өөрийн багшлах ур чадварыг хөгжүүлэх боломжтой болно.
Мөн суралцагч энэхүү хичээлийн удирдамж, даалгавар, зөвлөмжүүдийг бүрэн судалсны дараа боловсролын аль нэг байгууллагад очиж багшлах дадлагаа бодитоор гүйцэтгэх шаардлагатай. Дадлагын хугацаанд сургалтын үйл ажиллагаанд оролцож, ажиглалт хийх, төлөвлөгөө боловсруулах, хичээл заах, тайлан бэлтгэх зэрэг ажлуудыг хэрэгжүүлэх бөгөөд эдгээр нь ирээдүйн мэргэжлийн үйл ажиллагааны чухал туршлага болно.
Энэхүү хичээлийг амжилттай судалж, багшлах дадлагаа бүрэн гүйцэтгэснээр суралцагч багш мэргэжлийн үндсэн үүрэг, хариуцлагыг бодит орчинд хэрэгжүүлэх, сургалтын үйл ажиллагааг төлөвлөх, зохион байгуулах, үнэлэх, тайлагнах чадвартай болохоос гадна мэргэжлийн багшийн ёс зүй, харилцаа, хандлагыг төлөвшүүлэх чухал суурийг бүрдүүлэх юм.
