Хичээл заасан багш: Б. Очирбаяр (Ph.D)
“Боловсрол судлал” хичээл нь боловсролын мөн чанар, зорилго, үүрэг, хөгжлийн чиг хандлага болон боловсролын тогтолцоотой холбоотой асуудлуудыг шинжлэх ухааны үндэслэлтэйгээр судлахад чиглэсэн суурь хичээл юм. Энэхүү хичээлээр оюутнууд боловсрол гэж юу болох, боловсролын харилцаанд оролцогч талуудын үүрэг оролцоо, боловсролын үндсэн асуудлууд, боловсрол судлалын судалгааны арга зүй, боловсролын эрх зүй болон боловсролын төрөл, ангиллын талаар цогц ойлголттой болно.
Хичээлийн агуулгад боловсрол ба хүний хөгжил, сэтгэлгээ, боловсрол ба улс төрийн харилцаа, цахим сургалт, боловсролын чанар ба мэргэжлийн чадамж, зан чанарын төлөвшил, боловсрол дахь цахим хэрэглээ, гэр бүлийн боловсрол, ирээдүйн боловсролын чиг хандлага, донтох зан үйл, нийтийн боловсрол, боловсролын сэтгэл судлал, хөдөлмөрийн харилцаа зэрэг орчин үеийн боловсролын судалгааны чухал асуудлууд багтсан болно. Ингэснээр боловсролыг зөвхөн сургалтын үйл ажиллагааны хүрээнд бус хувь хүн, гэр бүл, байгууллага, нийгмийн хөгжилтэй уялдсан өргөн хүрээний үзэгдэл болохыг ойлгоход чиглэнэ.
Мөн энэхүү хичээлээр боловсролын үзэгдлийг шинжлэх, мэдээлэлд шүүмжлэлтэй хандах, судалгааны үр дүнг тайлбарлах, нотолгоонд тулгуурлан дүгнэлт хийх чадварыг хөгжүүлэхэд онцгой анхаарна. Суралцагчид боловсролын салбарт тулгамдаж буй асуудлуудыг онол болон практикийн үүднээс авч үзэж, орчин үеийн боловсролын хөгжлийн чиг хандлагыг судлан танин мэдэх боломжтой.
Хичээлийн онцлог нь оюутнуудын багийн бие даалтын ажил, судалгаанд суурилсан даалгавар, бодит жишээ болон кейсүүдийг ашигласнаас гадна багшийн шүүмж, зөвлөмжийг дэлгэрэнгүйгээр тусган өгсөнд оршино. Энэ нь суралцагчдад өөрийн ажлыг сайжруулах, судалгааны болон академик бичгийн ур чадвараа хөгжүүлэх, шүүмжлэлт сэтгэлгээг төлөвшүүлэхэд бодит дэмжлэг үзүүлэх давуу талтай юм. Энэхүү хичээлийг судалснаар оюутан боловсролын асуудлыг олон өнцгөөс авч үзэх, боловсролын орчин дахь харилцаа, бодлого, эрх зүй, хүний хөгжлийн асуудлыг шинжлэх ухаанч үндэслэлтэйгээр ойлгож үнэлэх суурь мэдлэг, чадвар, хандлагыг эзэмшинэ.
