Хичээл заасан багш: Б. Очирбаяр (Ph.D)
Гадаад хэл сурах үйл явцад хамгийн их нөлөө үзүүлдэг хүчин зүйлсийн нэг бол үгийн сан юм. Хэдий дүрэм, дуудлага, харилцааны чадвар чухал боловч хангалттай үгийн сантай байж сая хэлний мэдлэг бодит хэрэглээнд шилждэг. Гэвч олон суралцагч шинэ үг хэрхэн үр дүнтэй цээжлэх, удаан хугацаанд тогтоон хадгалах, хэрэглэх чадвар болгон хөгжүүлэх талаар зөв ойлголтгүй байдгаас хэл сурах үйл явц удаашрах, урам зориг буурах, цаг хугацаа болон санхүүгийн алдагдал хүлээх тохиолдол түгээмэл байдаг.
Уг хичээл нь Б. Очирбаяр докторын олон жилийн судалгаа, сургалтын туршлагад үндэслэн боловсруулсан “Шинэ үг цээжлэх арга зүй” номын агуулгад тулгуурлан заагдана. Энэхүү хичээлээр үг цээжлэх үйл явцын мөн чанар, ой тогтоолтын онцлог, хэл сурах сэтгэл зүй, суралцах орчин, төлөвлөлт, технологийн хэрэглээ зэрэг асуудлыг шинжлэх ухааны үндэслэлтэйгээр судалж, үгийн сангаа үр дүнтэй хөгжүүлэх арга замыг эзэмшинэ.
Хичээлийн хүрээнд шинэ үг цээжлэхэд нөлөөлдөг хүчин зүйлс, түгээмэл гаргадаг алдаа, ой тогтоолт ба сэргээн санах механизм, хэл сурах дадал хэвшил, цагийн менежмент, суралцах орчны нөлөө, бие даан суралцах арга барил зэрэг өргөн хүрээний сэдвүүдийг авч үзнэ. Мөн үг цээжлэхэд хэрэглэгддэг уламжлалт болон орчин үеийн арга зүй, цахим технологийн боломж, хувь хүний суралцах онцлогт тохирсон стратеги боловсруулах талаар практик мэдлэг олгоно.
Энэхүү хичээлийн онцлог нь зөвхөн “олон үг цээжлэх” арга заахаас илүүтэйгээр үг сурах үйл явцыг шинжлэх ухааны үндэслэлтэй ойлгож, өөрт тохирсон үр дүнтэй арга барилыг бий болгоход чиглэдэгт оршино. Суралцагчид өөрийн суралцах хэв маяг, давуу болон сул талаа танин мэдэж, урт хугацаанд тогтвортой хөгжих хэл сурах төлөвлөгөөг боловсруулах боломжтой болно.
Хичээлийг судалснаар оюутан шинэ үгийг үр дүнтэй сурах, удаан хугацаанд тогтоон хадгалах, хэрэгцээтэй үедээ зөв ашиглах арга барил эзэмшихээс гадна гадаад хэл сурах үйл явцаа илүү үр бүтээлтэй төлөвлөж, насан туршийн суралцах чадвараа хөгжүүлэх суурь мэдлэг, ур чадварыг олж авах болно. Энэ нь зөвхөн хэл сурахад төдийгүй аливаа мэдлэгийг системтэйгээр эзэмшихэд ч үнэтэй хөрөнгө оруулалт болох юм.
