Хичээл заасан багш: Б. Очирбаяр (Ph.D)
“Суралцахуй ба багшлахуйн үндэс, заах арга зүй” хичээл нь багш мэргэжлээр суралцаж буй оюутнуудад сургалт, багшлах үйл ажиллагааны онол, арга зүй, зохион байгуулалтын суурь болон мэргэжлийн мэдлэгийг эзэмшүүлэхэд чиглэсэн үндсэн хичээл юм. Багш хүн зөвхөн тухайн шинжлэх ухааны мэдлэгийг эзэмшихээс гадна суралцагчдад үр дүнтэйгээр хүргэх арга барил, сургалтын үйл явцыг оновчтой зохион байгуулах ур чадвартай байх шаардлагатай. Иймээс энэхүү хичээл нь ирээдүйн багшийн мэргэжлийн чадамжийг төлөвшүүлэхэд чухал ач холбогдолтой.
Хичээлийн хүрээнд заах арга зүйн мөн чанар, онолын үндэс, сургалтын хөтөлбөр боловсруулах аргачлал, хөтөлбөрийг баяжуулах болон хэрэглэгдэхүүн боловсруулах зарчим, хичээлийн төрөл ангилал, сургалтын зорилго, агуулга, арга, үнэлгээний уялдаа холбоог судална. Түүнчлэн багшийн бэлтгэл ажил, суралцагчийн бэлтгэл хангах арга зам, онолын мэдлэгийг практикт хэрэгжүүлэх арга барил, сургалтын судалгаа хийх арга зүй зэрэг багшлах үйл ажиллагааны үндсэн асуудлуудыг цогцоор нь авч үзнэ.
Мөн энэхүү хичээлээр багш болон суралцагчийн сэтгэл зүй, харилцаа, ангийн орчны зохион байгуулалт, үнэлгээ боловсруулах аргачлал, шалгалт боловсруулах зарчим, сургалтын цагийн менежмент, багш–суралцагчийн харилцааны онцлог зэрэг сургалтын үр дүнд шууд нөлөөлөх хүчин зүйлсийг судална. Үүний зэрэгцээ багшийн мэргэжлийн ур чадвар, ажил эрхлэлтийн боломж, боловсролын байгууллагын бүтэц зохион байгуулалт, багш ба судлаачийн ажил үүргийн ялгаа зэрэг боловсролын салбарын өргөн хүрээний асуудлыг авч үзэх болно.
Хичээлийн онцлог нь онолын мэдлэгийг практиктай уялдуулан тайлбарлаж, бодит жишээ, кейс судалгаа, багшийн туршлага, зочин илтгэгчдийн зөвлөгөө, олон улсын боловсролын тогтолцооны жишээг ашиглан сургалтыг зохион байгуулдагт оршино. Суралцагчид зөвхөн онол судлахаас гадна хичээл төлөвлөх, үнэлгээ боловсруулах, сургалтын хэрэглэгдэхүүн бэлтгэх, багшлах үйл ажиллагааг загварчлан хэрэгжүүлэх дадлага туршлага хуримтлуулах боломжтой.
Энэхүү хичээлийг амжилттай судалснаар суралцагч сургалтын үйл ажиллагааг төлөвлөх, зохион байгуулах, хэрэгжүүлэх, үнэлэх суурь мэдлэг, чадварыг эзэмшиж, суралцагч төвтэй сургалтын арга барилыг хэрэглэх, сургалтын орчныг үр дүнтэй удирдах, багшийн мэргэжлийн ёс зүй болон харилцааны соёлыг төлөвшүүлэх чадвартай болно. Мөн боловсролын байгууллагын үйл ажиллагааг ойлгон дүгнэх, ирээдүйн багш, сургагч, боловсролын мэргэжилтний хувьд амжилттай ажиллах бат бөх үндэс суурийг бүрдүүлэх юм.
