Хичээл заах багш: Б. Очирбаяр (Ph.D)
Их, дээд сургуульд элсэн суралцах нь зөвхөн шинэ мэдлэг эзэмших үйл явц бус, өөрийгөө танин мэдэх, бие даан суралцах чадвараа хөгжүүлэх, ирээдүйн зорилгоо тодорхойлох чухал үе шат юм. Гэвч олон суралцагч хэрхэн үр дүнтэй суралцах, өөрт тохирсон арга барилаа сонгох, сургалтын системээ ойлгох талаар хангалттай мэдлэггүй байдаг. Үүний улмаас суралцах хугацаанд цаг хугацаа, боломжоо бүрэн ашиглаж чадалгүй өнгөрөөх тохиолдол цөөнгүй байдаг.
“Сурах арга барил” хичээл нь суралцагчдад өөрийн суралцах онцлог, суралцах хэв маяг, танин мэдэхүйн үйл явцыг ойлгож, өөрт хамгийн тохиромжтой суралцах арга барилыг тодорхойлоход чиглэнэ. Хүн бүр мэдээллийг хүлээн авах, боловсруулах, тогтоох арга нь харилцан адилгүй байдаг тул өөрийн суралцах хэв маягийг танин мэдэх нь сурлагын амжилт, бүтээмж, урт хугацааны хөгжлийн үндэс болдог.
Хичээлийн хүрээнд суралцахуйн харилцан үйлчлэл, ой тогтоолт, сэтгэхүй, суралцах хэв маяг, идэвхтэй сургалтын арга зүй, боловсролын шинэчлэл, бүтээлч сэтгэлгээ, зорилго тодорхойлох аргачлал зэрэг хувь хүний хөгжлийн чухал сэдвүүдийг судална. Мөн боловсролын систем, кредит тогтолцоо, хөтөлбөрийн бүтэц, тэтгэлэгт хамрагдах боломж, сургалтын үйл ажиллагаатай холбоотой оюутан бүрийн мэдэх шаардлагатай үндсэн ойлголтуудыг тайлбарлах болно.
Энэхүү хичээлийн онцлог нь зөвхөн онолын мэдлэгээр хязгаарлагдахгүй бөгөөд бодит туршлага, амжилтын түүхүүдийг сургалттай уялдуулан танилцуулдгаараа онцлог юм. Хичээлийн төгсгөл хэсэгт амжилттай суралцаж, өндөр үр дүнд хүрсэн оюутнуудын туршлага, зөвлөгөө, суралцах арга барилын талаарх бодит ярилцлагуудыг багтаасан бөгөөд суралцагчдад өөрийн хөгжлийн замаа төлөвлөхөд үнэ цэнтэй мэдээлэл өгнө.
Түүнчлэн гадаадад суралцах боломж, тулгардаг бэрхшээл, тэдгээрийг даван туулах арга зам, улсын болон хувийн сургуулиудын онцлог, тэтгэлэгт хөтөлбөрүүдийн талаарх мэдээллийг зочин багш, төгсөгчид, солилцооны хөтөлбөрт хамрагдсан оюутнуудын бодит туршлагад үндэслэн хүргэснээрээ практик ач холбогдол өндөртэй.
Хичээлийг судалснаар суралцагч өөрийн суралцах арга барилыг тодорхойлж, суралцах үйл ажиллагаагаа илүү үр дүнтэй төлөвлөхөөс гадна боловсролын тогтолцоо, сургалтын орчин, тэтгэлэг болон хөгжлийн боломжуудаа зөв ойлгож, ирээдүйн зорилгоо тодорхойлох чадвартай болно. Энэхүү мэдлэг, чадвар нь зөвхөн оюутан байх хугацаанд төдийгүй насан туршийн суралцах чадвар, хувь хүний хөгжлийн бат бөх суурь болох юм.
