Хичээл заасан багш: Б. Очирбаяр (Ph.D)
“Суралцахуй ба багшлахуйн үндэс 2” хичээл нь суралцахуй, багшлахуйн онолын мэдлэгийг практик хэрэглээтэй уялдуулан хөгжүүлэхэд чиглэсэн ахисан түвшний хичээл юм. Энэхүү хичээл нь “Суралцахуй ба багшлахуйн үндэс 1” хичээлийн үргэлжлэл бөгөөд боловсролын хөтөлбөр боловсруулах суурь ойлголт дээр тулгуурлан тухайн хөтөлбөрийг сургалтын үйл ажиллагаанд хэрэгжүүлэх, суралцагчдад үр дүнтэй хүргэх арга зүй, зохион байгуулалт, үнэлгээний асуудлыг судална.
Хичээлийн хүрээнд хөтөлбөр боловсруулагчийн үүрэг, судлаач багшийн хөгжлийн замнал, сургалтын агуулга төлөвлөх аргачлал, хичээлийн эх материал болон жишээ боловсруулах зарчим, сургалтын зорилго, зорилтыг тодорхойлох, үнэлгээ боловсруулах үндэс, хөтөлбөрийн үнэ цэнэ, хамрах хүрээ, нөөц бололцоог төлөвлөх зэрэг сэдвүүдийг судална. Түүнчлэн сургалтын агуулгыг суралцагчдын онцлог, хэрэгцээнд нийцүүлэн боловсруулах, үр дүнтэй танхимын сургалт зохион байгуулах арга барилыг эзэмшихэд чиглэнэ.
Энэхүү хичээлийн онцлог нь цахим сургалтын орчинд хичээл боловсруулах, видео хичээл бэлтгэх, онлайн сургалтын техник хэрэгсэл сонгох, сургалтын бичлэг хийх, цахим хичээл бүтээх үе шат, сургалтын контентын чанарыг сайжруулах арга зүйг нарийвчлан судалдагт оршино. Суралцагчид онлайн болон танхимын сургалтын аль алинд нь тохирсон хичээл төлөвлөх, боловсруулах, хэрэгжүүлэх бодит ур чадварыг эзэмших боломжтой.
Хичээлийн туршид бодит жишээ, кейс судалгаа, практик даалгавар, хөтөлбөр боловсруулах болон хичээл бүтээх ажлуудыг гүйцэтгэх бөгөөд ингэснээр онолын мэдлэгээ бодит бүтээгдэхүүн болгон хэрэгжүүлэх туршлага хуримтлуулна. Мөн боловсруулсан ажлаа үнэлж дүгнэх, сайжруулах арга барилд суралцсанаар ирээдүйн сурган хүмүүжүүлэгч, сургалтын мэргэжилтний мэргэжлийн чадамжийг хөгжүүлэхэд чухал ач холбогдолтой.
Энэхүү хичээлийг амжилттай судалснаар суралцагч сургалтын хөтөлбөр, хичээлийн агуулгыг шинжлэх ухааны үндэслэлтэй боловсруулах, танхимын болон цахим сургалтыг үр дүнтэй зохион байгуулах, сургалтын хэрэглэгдэхүүн бүтээх, суралцагчдын хэрэгцээнд нийцсэн сургалтын орчин бүрдүүлэх цогц чадвар эзэмших болно.
